敏妮Talk:虛擬倉睇功力 - 溫敏妮

蘋果日報 2010/04/12 00:00


上次提到敏妮有錢唔識贏,完全因為唔識透過控制注碼去投資。講起控制注碼,敏妮都聽過有朋友問,唔少投資名家甚至證券行報告,每日都有股份推介,隻隻跟,邊有咁多注碼。敏妮都覺得,咪話個個名家嘅貼士隻隻都跟,單係一個名家嘅貼士都唔知點跟得足。
其實貼士只係一個方向,喺冇炒股靈感時作一提示。不過,敏妮對於有規律入市,成績會如何都冇概念,如果跟死一個名家嘅推介,究竟係贏定輸呢,與其靠估,最好就係計數驗證一下。敏妮以3月為例,試跟名家歐陽風嘅推介入市,投資額20萬蚊,當然呢個只係虛擬倉。
未計使費 月賺一成
以為條數好易計,但計多一兩日就知有困難,問題就係出喺注碼多少。起初由於倉內資金充裕,敏妮下注放膽好多,加上敏妮相信「蜜月期」,啱啱加盟,梗要顯下功架,所以首注投資額較大。不過,由於唔係每隻股份都可以玩「即日鮮」,要到指定目標價或止蝕價先沽貨,現金有限,到後期根本唔夠本錢落注,所以後來落注定咗個規範,除非啱啱沽咗貨,資金較充裕,就會大注一啲,所謂大注都係講緊3萬零蚊。否則以萬零蚊為限,或者只買兩手,但都面對有時連1萬蚊本都唔夠,更甚係試過買到淨番幾百蚊,又要按每日入貨規律,被迫點都要止蝕先有本錢第二日跟買(由於篇幅所限,虛擬倉運作詳情可以去敏妮Blog度睇)。
結果由3月1日開始入貨,3月31日埋單計數,都賺咗近一成。當然呢個係虛擬倉,未計交易成本,仲受到好多因素限制,投資冇咁靈活,但1個月用20萬賺到萬八蚊,都唔係易事。
溫敏妮
http://wanmanli.com/blogs/