陳倩揚今日揸車車住6歲大仔陳羲廷出外時不幸撞車，好在佢同仔都冇乜大礙。讀者陳小姐今日透過《蘋果》「爆相爆片」報料，話陳倩揚今日下晝喺火炭撞車，佢部黑色車俾後面部銀色私家車撞花咗條痕，警察到場了解之後，陳倩揚上咗救護車。

《蘋果》剛聯絡到陳倩揚，佢話今日下晝4點幾揸車停紅燈嗰陣，俾後面部P牌私家車撞，自己chok親條頸，o依家喺喺沙田威爾斯親王醫院等緊驗傷。陳倩揚話:「今日4點50分左右，我停紅燈都冇30秒，後面部私家車突然撞過嚟，我都嚇一嚇。我最驚大仔(6歲陳羲廷)啫，佢都喺車度，但反而係個仔問『媽咪有冇事。』好在佢有car sit，亦有扣安全帶，冇嚇親。」

陳倩揚話自己好少遇呢啲意外嘅經驗，一時間都唔係好知點處理，惟有報警求助。佢話:「私家車個司機即刻落車猛同我講對唔住、唔好意思。我報警之後警察話等佢哋嚟到先好郁車，我都知阻住後面其他車，好多巴士要埋站，佢哋係咁喺度鬧，我真係覺得好唔好意思，好在警察好快嚟到。」陳倩揚話自己部車後面撞凹咗同撞花咗，自己條頸都chok親，所以上咗白車去醫院驗查，但其他就冇乜大礙。