宋熙年同陳智燊（Jason）嘅囝囝Damon轉眼已三個月大，佢哋日前同囝囝搞咗百日宴，噚晚仲貼相喺Instagram分享，Damon眼仔碌碌望鏡頭，着住皮褸仔變型B。

宋熙年留言話多謝大小陳生建立咗呢個幸福三口之家，佢仲話多謝囝囝畀爹哋媽咪同佢配上親子裝。

《蘋果》今日打畀Jason，佢喺電話中話：「百日宴係日前搞嘅，要就爺爺嫲嫲、公公婆婆喺外地返嚟，呢次我哋只邀請長輩親友，簡簡單單，怕囝囝會扭計。會場佈置同主題係老婆親力親為。」問到點解幫囝囝着皮褸？佢話：「因為呢個款件衫最初係胡蓓蔚送，但好快唔啱着，我哋好鍾意呢個款，買咗另一套大件啲，留番百日宴着，於是我哋亦順理成章襯番囝囝。」Jason話囝囝大得快，冇買好多衫，會唔會想再追個BB，舊衫就可環保由弟妹着？愛妻號Jason話：「等老婆抖吓先。」

精選娛聞，喺晒《娛果》
http://fb.com/appledailyent