賭王何鴻燊入院至今已經第43日，但三位姨太同一眾仔女都口徑一致，對外聲稱賭王情況良好。三房陳婉珍嘅龍鳳胎千金超蓮，前日仲約埋三位朋友仔去中環開餐同shopping，睇嚟佢對爹哋嘅病況都相當放心。
前日下晝兩點，着白色緊身背心配短裙仔襯高踭鞋嘅超蓮，同三位年齡相若嘅女友人去置地廣場嘅cafe食lunch，當時超蓮心情勁靚，點咗西餐同果汁醫肚，同朋友邊食邊傾，其間佢笑容滿面，仲high到手舞足蹈㖭。
兩個月前超蓮18歲生日時，係咁意都收到爹哋豪送兩層樓做禮物，估唔到貴為何家淑女嘅佢並唔係大花筒，而且盡得家姐超雲真傳，就係食飯AA制喇。好似超蓮前日呢餐飯，都係同三個朋友夾錢，見佢飯後喺銀包拎咗200幾蚊畀朋友，之後佢就拎住一袋購自英國平民品牌FrenchCollection嘅戰利品，同朋友一齊離開。

仔女開學難捨賭王

至於醫院方面，噚日二房嘅何超鳳、何超蕸等都如常去探爹哋。三姨太陳婉珍就話啲仔女差唔多要離港去外地返學，都唔捨得賭王，陳婉珍話：「都冇辦法，始終都要返學。」當三姨太離開醫院時，被問到其女兒超蓮將私人相上載facebook，佢完全懶理。
另外，下午時分，港安醫院對面嘅港安大廈發生火警，消防車到場停泊喺附近，去醫院探病嘅超儀、超鳳，惟有喺路口落車再行上去。