丁子高同楊千嬅早排幫深圳衞視，拍咗個《極速前進》真人騷節目，喺片段裏面見到丁生同丁太成日因為比賽而嘈交，兩個搞到黑口黑面，不過兩公婆邊有隔夜仇，好快已經和好如初啦。

丁子高一向鍾意運動，仲有跑開馬拉松㖭，而早前身體唔係咁好嘅千嬅，近日的起心肝開始跟呢兩位「高人」（另一個係徐濠縈）一齊跑多啲，既可以練好氣量，又多咗運動鍛煉身體，真係一舉幾得。

噚日丁生就貼咗張兩公婆同肯雅徐，喺水塘附近跑步嘅相上網，顯示佢哋足足跑咗8公里。不過留言除咗好奇兩公婆一齊跑步之外，最多人提嘅竟然係讚千嬅嘅素顏look好少女feel，同埋話千嬅點解可以keep到咁「白雪雪」。