【「點解你俾樂哥哥攬?」】千嬅囝囝Torres憎余文樂 一見即走
torres千嬅春嬌樂哥哥
今日洗米華周焯華到澳門出席第二屆澳門國際影展暨頒獎禮記者會,另一嘉賓係明星大使身份出席嘅楊千嬅。千嬅話有計劃帶囝囝去澳門,但未必帶佢睇戲,因為囝囝仲未夠秤,《春嬌》未夠秤睇,《Wonder Woman》都未夠資格入場。
千嬅話Torres都有問過點解唔可以睇《Wonder Woman》,係咪因為戲裡面有「kill people」?千嬅笑言:「唔知點解佢會知。佢成日都問我點解呢啲嗰啲唔睇得,我都有解釋佢聽。」
咁囝囝睇過阿媽邊部戲?答案係《五個小孩的校長》,Torres睇到戲中小朋友可以入廚房煮嘢食,就問媽咪點解其他小朋友可以但佢唔可以咁啦;到《春嬌救志明》上嗰陣,Torres見到張海報,又問媽媽點解俾樂哥哥(余文樂)攬住,點解隔籬嗰個唔係爹哋。千嬅笑言:「有日我同爹哋(丁子高)一齊出去,我解釋俾佢聽話媽咪有套戲要上,Torres就問:『咁如果爹哋去,咁樂哥哥喺邊呀?』佢已經覺得樂哥哥一定會喺我隔籬。」
咁Torres係咪好憎樂哥哥、覺得佢搶咗媽媽?千嬅笑:「係唔太舒服囉。小朋友係好純真。」見過樂哥哥真人未?「拍戲之前見過,拍緊嗰有喺facetime見到佢,一見就走開咗。」因為見到樂哥哥都係喺媽咪身邊…
話題轉咗去Torres關心樂哥哥手上嘅drawing,千嬅話希望囝囝如果要紋身嘅話等大個啲先,但如果要紋喺啲睇唔到嘅地方都冇法。咁如果紋女朋友個名呢?千嬅就話會以朋友身份勸佢唔好,「除非你好肯定嗰個人,如果唔係好尷尬。媽咪以前都遇過呢啲好尷尬嘅事,我會作個咁嘅故仔同劇本,叫佢諗下。」
咁如果紋媽媽個名呢?佢諗咗陣就話:「真係唔好囉,如果唔係佢會俾人標籤為『有事嘅兒童』同裙腳仔0架。」
千嬅一提起囝囝,就有說不完的話題,因為囝囝真係「每事問」。