港股調整，有人歡喜有人愁，開心媽咪Danise最興奮，佢成日話個市跌，月供交行（3328）就可以趁平買多幾十股。不過，食晏見到曾經一注獨買和黃（013）嘅「金手指」孫柏文就無厘神氣，佢話同股票無關，只係新買返嚟嘅部NokiaN93，漏咗喺的士，幾千蚊就係咁冇咗。

「唔緊要啦，你個blog收視一定高過敏妮Talk，契大佬Kenny最近幫我向Google申請咗廣告，一日都有十零蚊美金廣告費，你個blog流量高過我，廣告費一定唔少啦？」
「敏妮，你講乜嘢Google廣告？」
「你唔知咩？唔緊要，等陣send條link畀你。」
「你話十零蚊係美金？」
「係呀！」
「你個blog𠵱家clickrate幾多？」
「好少咋，3位數字啦！」
「咁都有十幾蚊美金一日，尹思哲有4位數字，加埋我個都係3個位數字，喂，呢盤生意有得諗。」

「搵money，我鍾意，點搵？我知喇！你想我哋互相吹谷，等多啲收視，clickrate升，廣告收入自然多，然後就IPO，搞上市。」
「唔止IPO，敏妮你聽我講，我個blog，加埋你個blog，再加埋尹思哲，我哋都會有廣告收入，我哋成立一個基金，由呢個基金持有呢啲blogs，然後就賣啲基金units出去，基金每年將嚟自blogs啲收入派息。」
「呢個方法好處係，有揸units嘅投資者，會更加落力宣傳啲blogs，增加收入。」
「其實呢個生意模式仲可以發展落去，每個blog嘅income都好fluctuate（波動），但落到個基金度，波幅就會相對減低，我哋可以將個基金units分做唔同評級，好似債券咁，評級高啲嘅units價錢貴啲，但income有保證，評級低嘅價錢平啲，但要冒風險。一路發展落去，就好似股票衍生工具咁，無限衍生。」
「咁你仲唔寫稿，寫好啲呀！」