將於農曆新年再開演唱會嘅鄭中基（Ronald），早前接受商台《1圈圈星光背後》主持人梁泰來嘅訪問，節目中Ronald重提當年飛機醉酒事件，當時父親鄭東漢無怪責佢，反而關心佢，佢仲第一次攬住爸爸喊。自從結咗婚、生咗大女之後，Ronald直言冇再夜蒲嘅原因，係因為女兒需要佢多過朋友，自此改變好多。

父親係金牌大風大老闆鄭東漢嘅Ronald，當年由台灣紅到返香港，推出過多首金曲。事業如日中天嘅佢，於2000年初因飛機上醉酒鬧事，搞到形象受損，事業重創。Ronald喺訪問中重提此事，佢自爆當時父親不但無怪責佢，仲反過來攬住佢講心底話：「我以為佢會好嬲！以為爸爸會講：『你走喇！以後不用回來！』反而佢冇咁講，爸爸第一件事攬着我，攬得好緊，從小到大係第一次，佢係個少說話嘅人，佢攬住我話：『我知道你好攰，你先休息一下，有咩事我哋之後先慢慢話，呢個時候你不用想其他事情了。』嗰一刻我簡直忍唔住，哭得好厲害，爸爸從未試過咁深情跟我說話！當我做咗爸爸嘅時候，我就明白，好多時我都唔知點樣講出口，但唔代表我唔愛你。」

之前愛夜蒲嘅鄭中基，自從再婚於2011年太太余思敏生咗大女後，Ronald直認改變咗好多，原因係覺得女兒需要自己多於朋友，佢話：「我覺得我需要給佢安全感，所有事都要站在小朋友嘅角度諗。」講到以前經常夜蒲，o依家冇人叫我去，連谷德昭都唔搵佢，就算食飯或去飲杯酒聊聊天都冇。佢覺得小朋友需要自己多過朋友，「朋友搵我都係飲酒傾偈，但囡囡冇朋友，點可以丟下佢呢？而且照顧小朋友，並唔係想像中咁容易，陪佢玩、抱抱佢就好累，好多事情要注意。」

精選娛聞，喺晒《娛果》
http://fb.com/appledailyent