港人近排談論嘅話題,唔係豬就係牛。豬仔病雖則殺到嚟,好彩威力唔算好勁;至於個股市就日日升,令人憧憬牛市就快蒞臨。唔理係豬定係牛,最緊要係人人身體健康同埋有錢搵。今期推介愛隊廣島三箭作客贏千葉市原4:2,希望可以帶挈捧場客執番多少啦!
三箭上屆喺日乙入咗99球,今屆升上日聯後,入球能力仲係咁強,10場入19球,入球數目僅次於飛腳(9場入22球)。佢哋除咗前鋒佐藤壽人有料到,連班中後場球員好似係高萩洋次郎、柏木陽介同埋槙野智章等都好掂,配合埋個3-6-1嘅攻擊型陣式,出征實力麻麻兼主場冇威力嘅市原有力大勝一場。不過,市原後衞齋藤大輔近來腳風順,而且前線嘅深井正樹同埋卷誠一郎亦有數糊能力,博三箭贏4:2。