韓國「國民妹妹」IU日前推出新碟《Palette》，同名新歌亦橫掃多個音源榜，又喺多個音樂節目獲得冠軍，成績相當好，有見及此IU為答謝粉絲，日前喺YouTube官方頻道公開長達13分鐘、拍攝新碟內頁相時嘅花絮。花絮中更見到IU嘅另一面，私下嘅IU都相當搞鬼，成日同工作人員開玩笑。

將於本月16號踏入24歲嘅IU，已經慢慢冇乜少女味，開始行成熟路線。花絮其中一幕更見IU罕有地性感上陣，穿上sports bra大晒小蠻腰及腹肌，IU仲問工作人員見唔見到佢嘅腹肌，點知工作人員就話見唔到，搞到IU勁無奈，而製作團隊亦認為IU嘅腹肌未係最完美狀態，所以呢輯相最終冇出現喺《Palette》中，粉絲只可以透過呢段花絮先睇到IU嘅腹肌，不過就有粉絲唔滿意花絮中後製嘅字幕遮住IU嘅好身材，搞到冇嘢睇咁話。