今季只剩番三個賽日，潘頓與莫雷拉的冠軍騎師之爭，已進入埋身肉搏戰的最後階段，兩人不時串Q出現激戰鏡頭。

潘頓接受訪問時曾提到，目前129比126只head住莫雷拉三Win，領先優勢唔算明顯，雷神隨時一日掃幾Win追過他。

潘頓直言對目前形勢未能安心，當務之急是盡力爭取實力座騎，希望陣上際遇可好一點，在每次賽事都有頭馬進賬，從而直領到底奪冠。

不過潘頓都多人撐，練馬師蘇保羅是其中一位，須知蘇廐近六Win 有四場由潘頓經手，包括剛周三（4日）谷戰的「好準確」，騎練可謂合作愉快。

蘇保羅贏完「好準確」後表示，對於季內取得39Win感到滿意，並希望自己埋單可突破40Win。

蘇廐周日（8日）採取精兵制，三匹戰馬得一駒交由潘頓操刀，就是第六場四班泥地1200米的「一帆風順」。

六歲的「一帆風順」擅跑泥地1200米，在四班爭同程三戰獲冠亞殿各一，兩次上名皆配潘頓，人馬至夾檔。

「一帆風順」前仗重返四班，回師強項泥地1200米，在潘頓胯下搏失得第二，上場初配見習生黃俊減十磅，可惜發揮未如理想，拉士騎落去食得唔應，最終梗頸第四。

今仗用番最佳拍檔潘頓，抽3檔有利發揮，大有機會贏馬補中。

－－－－－－－－－－－－－－－－－－－－－－－－－－－－－－－－－－－－
愛馬事女神2018 競馬主播真•育成