為有條件單身男女而設嘅《愛情DQ掣》已經進行初次見面，究竟被選中嘅五男五女可唔可以成功配對呢？就睇佢哋玩遊戲嘅表現喇！

上回講到，Model界法拉bb Sumi喺第一印象攞足分，不過唔知係咪Sumi玩踩波波嘅時候太文靜，後期焦點轉咗落泰拳女Debby身上。遊戲第二部份，係畀參加者自由選擇心儀異性玩二人遊戲，原本對Sumi有興趣嘅有樓男Steven同文青系Daniel都揀咗Debby出嚟玩。

之但係，正所謂「你揀人，人揀你」，泰拳女Debby嘅選擇竟然係Youtuber浩嵐，表面出口寸佢，「你平時係咪都咁多廢話講㗎？」私底下訪問就話，「我意思係佢好搞笑，然後講笑自己唔笑，咁先搞笑！」睇返阿浩嵐哥個樣實在稱唔上俊俏，但勝在個人搞笑，Miss思雅同學生SoSo都係揀佢玩遊戲，連法拉bb Sumi都讚佢搞笑得嚟有智慧。浩嵐哥就風騷咁話，「o依幾年開始學識幽默，發覺都係一條橋嚟嘅！」睇嚟，「你的樣子如何，你的命運也必如何」係有例外嘅！

雖然焦點畀泰拳女Debby搶走咗，但係銀行Derek就從一而終，由第一印象時睇中法拉bb Sumi，玩遊戲時都係揀同Sumi玩，仲要好好彩咁抽到「咬百力滋少過0.5cm」，差啲錫到嘴嘴，真係恨死隔離。不過Sumi就顯得超級尷尬，全程無望過Derek一眼，呢幾分鐘好似過咗成世咁，仲向製作組拋低一句，「唔過電嘅！」唉...陰公...

經過兩個遊戲，參加者都齊齊出手DQ人，邊個咁唔好彩？即刻睇片！

主持：何宛珊 (表妹)
攝影：輝、馮燊明、梁依能、Sum
後期：馮燊明
視覺設計：Cammie
編審：仙

更多娛聞，喺晒《娛果》
http://fb.com/appledailyent