上周政務司司長林鄭月娥見建制派議員，啲建制派議員就同林鄭話叫「競爭事務委員會」查領展（823）。而林鄭都話會親自跟進。冇幾日有報道話梁振英都聲稱緊張問題，兼對領展強烈批評。

咁搵領展祭旗，應該兩位嘅假想敵都係財政司司長曾俊華。睇曾司長歷年講話，領展議題都算係個重點分水嶺。

不過領展股東今次可能有着數，點解？家陣矛頭直指街市，我曾想做佔香港人口約百分一，調景嶺嘅其中一位區議員。調景嶺係最好例子。差不多七萬人，街市得一，領展嘅，仲要好細，所以店與店之間冇競爭，買餸超貴，蔥都要5蚊。

解決方法，當然係附近開新街市，不過附近就算康民署有地起公園，都話因部門之間不能協調，所以唔會有新嘅地底街市（地面繼續做公園）。

關股東咩事？如果你覺得一個能收5蚊賣蔥嘅商人，因業主收平啲租所以就收平啲個客，你冇可能會睇財經版。即係冇新街市，個業主一定收到貴租。不過如果領展被政府逼唔俾收，點好？領展咪將呢個權賣出囉！

我預期政府一旦郁手，已經賣嘢嘅領展，將賣得更快。睇呢幾年記錄，新買家令大家知咩叫「瘋狂加租」。喺樓市呢個周期近頂賣嘢，仲要買家覺得你係焗住賣，反而對股東有着數。到時買餸嘅人點？Whocares。


孫柏文


掌握財經生活資訊，即Like「蘋果ATM」fb專頁啦！
http://fb.com/appledailyatm