早輪H股指數炒到㷫烚烚，最高升逾10700點，喺討論區就有網友話已經炒老闆魷魚，趁住市旺，專心全職炒股。
不過，唔係人人心口都掛個勇字，好多散戶都要一邊做嘢，一邊偷雞睇吓股價，結果往往錯過入貨、出貨時機。
係《香港168論壇》，網友牛頭角順叔就打趣咁問：「究竟乜嘢行業嘅人最適宜炒股呢？」
順叔仲以自己嘅親身經歷為例，「我估其他網友都會有咁嘅經驗，睇中隻股諗住第二日一早入，或決定放咗隻高危股，但無奈第二日一返工就多嘢做到死，到收市都未有時間；想話隔日再補番，但你想入或沽嘅股已大升或狂跌，總之好邪啦！好難有個靚位去買入賣出。我諗除咗同股票相關嘅行業，好似經紀行，或者係開市時唔使開咪嘅DJ、部份喺辦公室做嘢嘅非前線公務員，橫掂一篇幾頁嘅字都要打幾日，仲可以有時間睇八卦雜誌，梗有時間炒吓股啦。」
小陳二好快諗到，「梗係有房坐嘅經理啦！你估佢哋真係咁專心做嘢，成日聽到佢哋喺度打數字，你慌唔係睇緊股價咩！」
網友19亦講：「做文職工都得㗎，成日對住部電腦，好易瞞過老闆睇價出貨。」