多得神助，勞工及福利局局長蕭偉強今日可以同傳媒茶敍告別，因為自今年初接任局長後，副局長冇人頂，常秘又退休，一人頂3份工，「每日都好長」，仲要處理標準工時、強積金對沖等棘手議題，「能夠嚟到（茶敍），同大家輕鬆傾偈，真係神蹟嚟」。所以上任局長後，佢都掛住舊老闆張建宗，出名勤力唔放假，「標準長工時嘅老闆」，越多工作越精神，笑言係「高難度危險動作」，好難學。

即將卸任局長，亦告別39年公務員生涯，有兩件事啟蒙蕭偉強一生。佢大學畢業後做過香港話劇團演員，21歲入政府做EO，最初分派到音樂事務統籌科，上司喺前運輸司蕭烔柱，教曉佢公務員首要廉潔奉公，唔好白逗人工，要對社會有影響力。另一宗係80年代油麻地艇戶事件，協助艇戶嘅兩位神父讓佢了解到，同理心好重要，亦要務實，「唔會站喺道德高地」。

憶當年難免有感慨，未做問責官員前，蕭偉強做咗6年半復康專員，同社福界關係良好，「得到好多超越公事上嘅朋友」。但近年社福界唔少新血上場，做乜都立場先行，佢認為唔好過份考慮政治得失，要從社會整體利益出發，「有啲道德勇氣」。

好多做官都怕傳媒，蕭偉強就唔係咁睇。佢記得《蘋果日報》2013年曾頭版報道僱用殘疾人士嘅好老闆，佢話報道出街後產生漣漪效應，鼓勵業界多聘殘疾人士；又好似《明報》前年報道劍橋護老院涉不仁道對待長者，雖然畀人鬧，但亦促使政府加強院舍監管。

同傳媒茶敍又點少得講對沖？不過係「假期」對沖。原來蕭偉強做復康專員時，有成7個月假未放，但因要出任問責官員，假期被對沖，沖剩約兩個月「補水」；後來由副局長接任局長，又再對沖多次，冇咗兩、三個月假。好彩去年11月獲准放假兩周，陪太太去日本慶祝結婚30周年。

仲有幾日退休，蕭偉強遲啲會同家人去地中海、日本旅遊充電，但就唔會重返官場或做全職工作。佢話過完冷河後，會考慮開辦社企或做義工，尤其係復康工作，繼續幫助弱勢社群。