以往英超鐵人，大家都會諗起車路士中場林柏特，原來般尼茅夫中堅史堤夫曲克，都可以列入今季鐵人之列，因為經過上周擊敗般尼後，曲克踢足今季37場聯賽，而且全部正選兼打足90分鐘，般茅鐵人真係當之無愧。

26歲嘅曲克接受BBC訪問時話，做到鐵人都是因為頭家，事關上年夏天曲克就做咗老豆，佢都深知要養妻活兒嘅責任都相當大，所以由季初集訓開始，就盡力保持自己喺最佳狀態；曲克今年暑假更仲會同未婚妻正式結婚，亦都準備迎接第二位小朋友出世添，希望曲克可以責任越大，能力越大，繼續幫般茅穩住英超席位。