丹麥國家隊將要喺周四迎接對斯洛伐克的友誼賽，同埋下星期對威爾斯嘅歐洲國家聯賽賽事。不過，一眾丹麥現役國腳就同丹麥足總因為新嘅贊助商合約傾唔埋，所以拒絕代表國家隊比賽，要搞到丹麥足總徵召二隊出戰歐國聯嘅比賽。

話說丹麥足總希望同國腳簽訂一份新嘅贊助協議，不過就引起好多球員不滿，因為新協議同球員本身個人贊助有抵觸，隨時會影響球員收入，所以以卡斯柏舒米高同基斯甸艾歷臣為首嘅丹麥國腳都堅決抵制。而其實球員有反建議足總調整協議，將贊助只係集中喺國家隊上，唔好牽涉到球員自身，不過就被足總方面拒絕，雙方就陷入膠著狀態。所以嚟緊兩場比賽，一眾常規國腳都唔會入選，就連教練夏拉特都唔需要督師。

丹麥足總就警告，指國腳們嘅行為會令丹麥足球進入萬劫不復嘅情況，亦可能被歐洲足協罰款同埋罰停賽。但基斯甸艾歷臣就講到明會抗爭到底，仲話有好多人撐一眾國腳。而其實未夠一年前，丹麥女子隊亦因為佢哋嘅就業問題，拒絕喺女子歐國盃外圍賽對瑞典嘅比賽上陣，結果丹麥足總被罰18,000英鎊（約181,000港元），所以再出事的話，可能會被取消歐國盃參賽資格。

--------------------
荷蘭橙衫軍大舉進駐BFB CHAMPIONS 2.0！荷蘭球星機率 7 倍UP！立即下載 http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports