華人練馬師開季暢旺，繼徐雨石連續第二日贏馬後，上周六爆冷贏「飛星凱旋」的蘇偉賢，這晚谷草亦順利延續勝勢，在第二場四班1200米，佢同雷神莫雷拉合作贏出2.5倍大熱門「勁飛聖」，組合獨贏A1派17.5元。

「勁飛聖」上季谷草煞科之夜，初配雷神於四班谷草1200米跑第二，輸俾寶遜同姚本輝合作馬「綠茵風采」，今次原庄配搭再戰同班同程，被捧成大熱。結果「勁飛聖」守好位一步不蝕下，無驚無險地以半馬位之先勝出，四歲新西蘭馬對上三場全做阿二後，終於坐正開齋，本身亦保持谷草四戰一冠三亞全入Q佳績。

上季後期雷神三番四次出擊輸畀羅理雅，呢場佢可算吐氣揚眉，兼為自己日內啟程遠征澳洲跑金玫瑰錦標一級賽壯行色，事關羅理雅座騎「段段有」受制於133頂磅，後上不及輸少少俾「勁飛聖」屈居亞軍，三、四名分別為「駿瑪」及「靚先生」，四重彩派3,030元。