睇完《英雄》及《無間道》，才發現原來當年楚原導演拍古龍的所謂新派武俠片，確係有料到。《英雄》那些劍在人在，劍亡人亡的對白，證明古龍走在時代之前二十年。上一批邵氏電影DVD和VCD楚原加古龍有一部《流星蝴蝶劍》，其實第二批嘅《天涯明月刀》拍得更好，必睇！據講邵氏第一批影碟賣到斷市，第二批正嘢也多。林黛《藍與黑》和秦劍經典《何日君再來》當然正；楚原另一部電影《七十二家房客》，當年憑一句「有水放水，冇水散水！」諷刺片中的消防員要先攞錢後救火，而收五百多萬，連李小龍的《猛龍過江》都非敵手。論戲平平而已，勝在有歷史意義。但我最想推介的是程剛的《天網》，程導演的《十四女英豪》盛名蓋過他的其他作品，實則他拍時裝犯罪片也有一手，《天網》拍得緊湊有力，氣氛迫人。