Mango王秀琳雖然淡出幕前好耐，但依然同好多圈中猛人或富家公子來往甚密，經常傳緋聞。

今日下午5點半左右，記者就發現Mango一個人現身銅鑼灣嘅CitySuper掃貨，佢著上簡單衛衣黑色褲，戴住口罩喺超市搵心頭好，由於佢生得幾高，所以都幾顯眼。Mango推住車仔，開頭專揀廚具同碗碟，應該搵緊整蛋糕或麵包嘅用具，搵唔到目標佢就去問店員。其實Mango近期喺Youtube開咗個頻道教煮嘢食，好可能就係去準備材料喇。

Mango之後再去揀凍肉，臨走時仲買咗麵包，之後佢發現記者就急急腳走人，俾錢時都背住個門口，又冇帶環保袋，最後一抽起袋戰利品就一支箭咁衝去搭電梯離開。