盧凱彤愛音樂，也愛鼓勵新人。她昨日為ViuTV《全民造星》擔任評判期間，特別點名叫參賽者32號陳卓賢（Ian）出來清唱表演，並稱讚Ian說：「我聽到我要聽嘅嘢。」節目中她又借昔日at17公開表演期間，拍檔林二汶被取笑「豬扒收聲」經歷，鼓勵身型肥胖的45號梁業（肥仔），若他日表演被人喝倒采取笑時不但不要介意，還要跟對方說句多謝，再做好自己。

《蘋果》今日聯絡了兩位獲盧凱彤鼓勵的Ian和肥仔，二人均對盧凱彤離世感到突然和難過。肥仔說：「大家睇我外表可能平平無奇，純粹一個肥仔，唱歌未必好出眾，當佢睇見我跳舞嘅時候，佢見我最專長嘅出番晒嚟，我feel到佢感覺係就算睇你外表覺得你唔掂，其實你係有實力做到畀人睇，你要相信自己。」

原來肥仔昨日錄影以外曾私下跟盧凱彤傾談，肥仔說：「我其實私底下有同傾咗幾句，佢同我講咗幾句說話，佢話：『肥仔，你一定得㗎，你一定要加入呢行，我睇好你呀，同埋你唔好放棄呀。』我feel到佢係真心同我講，嗰個位我好感動。後尾我聽啲工作人員講，佢問啲人有冇機會簽到肥仔，當我聽見呢個消息時，真心覺得佢真係好欣賞我，佢用咗佢語言去鼓勵我，亦都用咗佢嘅行動去支持我，我知道之後係好開心，但當我今日聽見呢個消息，真係好震驚，好想喊。」肥仔並表示希望繼續努力打入十強以答謝盧凱彤。

Ian說：「噚日Ellen（盧凱彤）畀咗個機會我叫我出去唱歌，我冇機會親口多謝佢，真係好唔開心。」盧凱彤可有跟他說甚麼鼓勵說話？Ian說:「佢叫咗我出去唱歌，比咗comment我話：『都係我想聽到嘅嘢，幾好聽。』冇乜其他好特別嘅說話，但我會覺得佢畀咗個機會我，跟住認同我，我係好感激嘅。」可會做好一點以答謝盧凱彤？Ian說：「一定會。我好感激佢畀咗機會我，所以我一定會做好啲。」

對於盧凱彤的離世，ViuTV今日表示惋惜。至於已經錄製的節目，將會安排稍後公布。