嗰頭講緊今晚（27日）快活谷賽果「潘潘」聲，小潘潘明輝七場勝出「平天下」後，呢頭又見番大潘潘頓揚威凱旋門，佢於最尾第八場三班1200米，夥拍方嘉柏馬房「愛樂寶」一放到底大熱建功，單Win及組合獨贏A1分別派29.5及19元。

全晚埋單潘頓食出大四喜，四匹頭馬包括「葵涌老友」、「小島怡情」、「紅星」及「愛樂寶」，潘頓亦自然贏埋騎師王，打造個人開季以來代表作。

四歲馬「愛樂寶」有報名上周三（20日）谷草三班1200米，且已卜定由潘頓策騎，出埋王牌卻只做第一後備，最終未能補出參賽。

今次「愛樂寶」再報同班同程，順理成章做正選，亦順理成章由潘頓上陣，抽埋1檔注定有運行，臨場亦有動靜，7月底剖腹誕下愛女Kyra，榮升媽媽不久的黃婉曼，今晚和老公馮柏基拍拖入場，為友人馬主徐志剛的「愛樂寶」打氣，結果此駒和潘頓合作由頭帶到尾，小勝頸位，一干人等齊拉頭馬，非常熱鬧。

「愛樂寶」服役七戰增至三冠一亞三殿，未失過前四名，表現可謂忠心準繩。

全晚大旺大冧巴輕磅馬，第八場亦不例外，8號「愛樂寶」跑第一，12號「好益善」着晒啡燈開跑，最終後追不及做阿二，卻開出14倍啡燈Q益咗落飛黨贏大錢。三、四名分別為10號「開心歡星」及5號「問鼎高峰」，四重彩派7,707元。