【唔講得笑】劉永健爆洪金寶親自下廚 周家蔚大叫緊張
劉永健郭政鴻洪天明周家蔚陶大宇下廚洪金寶
劉永健同周家蔚合作主持ViuTV節目《友枱VIP》,今日喺灣仔錄影,邀請好友陶大宇同郭政鴻擔任嘉賓,劉永健透露小學5、6年級已經識得煮飯,開始培養對烹飪嘅興趣。周家蔚表示平時都會下廚,老公洪天明對佢嘅廚藝有讚亦有彈,不過令佢最緊張,都係老爺洪金寶嘅評語,「每次我去老爺屋企食飯,佢一定喺廚房,就算佢唔煮都要監督,如果佢嚟我屋企,我就好緊張,好食嗰啲,佢會話好食,唔好食嗰啲,佢唔會彈,只係唔出聲。」劉永健即刻話:「以前細個同洪天明兩家人一齊去布吉島旅行,買完海鮮返去,Uncle叫個廚師行開,佢去煮埋。」
至於陶大宇表示自細受媽媽影響,搞到o依家都好鍾意煮嘢食,佢話:「中西都會煮,乜都得,10樣8樣都識煮。」郭政鴻話:「如果牽涉人多,因為份量唔同咗而失手。」有冇試過陶大宇嘅手勢?郭政鴻笑住話:「私下未,但上次佢做個飲食節目就試過。」
精選娛聞,喺晒《娛果》
http://fb.com/appledailyent
陶大宇(左)同郭政鴻(右)做劉永健等人新節目嘅嘉賓。