【滙豐失息．國金89樓】滙豐收息的士哥的抉擇（程總裁）
蘋果日報 2020/04/01 15:47
滙豐滙控股息程總裁國金89樓
的哥已屆36歲，聽到愚人節滙豐停派息，同失業無咩分別。
今早一位衣衫襤褸的中年漢未有預約下，逕自走來本總裁的office國金89樓，遙望窗外景色神色凝重，本總裁疑惑：「阿哥，你邊位？」中年漢幽怨地回道出自己的故事。
2017年時，33歲的中年漢揸咗的士11年，過去每月開足30日工，每日揸12個鐘，一個月平均儲17,500元，一夠錢就買滙豐，「世紀供股時，手持5,200股，到2016年12月，終於買夠40,000股，每個月可收過萬元利息。」
如果滙豐冇減息，中年漢每年每股收4元息，等於16萬元，相當於每個月有13,000元收入。佢生活要求不高，與母親同住自置頹樓，日日打機、上網、睇書、打波，一個月花費幾千元，已經好開心，從此就未有開工。
現在中年漢已屆36歲，歎世界3年有多，今日晨早聽收音機知道愚人節滙豐宣佈停派息，晴天霹靂，未來一年失去每月13,000元收入同失業無分別，最緊要係驚滙豐之後側側膊大削股息，一鑊翹起佢嘅財務自由人生。
程總裁安慰佢事情未必太壞，並鼓勵佢發起滙控小股東大聯盟，發起四大訴求。
第一，Band 1以上嘅滙豐高層全部要停止發放一年薪金。有甚麼理由你老闆股東我冇息收，你哋班高層繼續有人工收，唔出糧就係保留資本金最好方法，除非滙控承諾2021年每股派double（8元）利息。
第二，即時研究分拆滙豐亞洲香港上市。滙控總部在英國，BOE（英倫銀行）說話冇理由唔聽，我樓下金管局都未必有牙力，但過往咁多年滙控業務重心在大中華，點可能個軀殼喺香港，靈魂就畀英國控制？一於要求元神歸位。
第三，以股代息應該保留。向所有普通股股東派發相等於0.21美元利息嘅股份，對於資本金就唔會有重大影響，但會有攤薄效應。
第四，訴諸法律行動。滙控業績報告及年報寫到明會派0.21美元利息，除淨都做埋，此乃承諾及具有法律效力，唔派即係欺騙買咗嘅股東，可循民事途徑起訴。
中年漢聽完之後個人樂觀晒，覺得前景其實唔算好悲觀，決定去揸返的士，程總裁疑問：「你係咪傳說中嘅滙豐的哥？」他陰陰嘴笑，打開門落樓了。留意番係落樓梯。