【韓流】勝利玩刺繡唔小心拮親手 T.O.P請假送GD入伍
我獨自生活GDT.O.P勝利BIGBANG
韓國天團BIGBANG成員勝利近日好忙碌,早前來港宣傳首部華語電影《宇宙有愛浪漫同遊》,電影已於噚日上映,而佢早前參與MBC綜藝節目《我獨自生活》拍攝工作,節目組於今日公開咗最新預告。
喺預告中,勝利再展示佢嘅流利中文,拎住電話講中文,發音超級準,之後鏡頭就播出佢做緊刺繡,估唔到平時感覺好貪玩嘅勝利,都會鍾意做十字繡,不過佢就唔小心刺到手,即時痛得大叫起來。同時生意多多嘅勝利又開拉麵店又開夜店,所以喺節目內佢就以CEO身份同人開會,不過佢喺現場就被人寸佢成日掛住出埠,令佢即時冒汗。
另外,BIGBANG隊長G-DRAGON(GD)周二以現役陸軍入伍,GD父母及胞姊都有親到現場送GD入伍,而噚日又流出當日成員T.O.P都有送GD入伍嘅照片,唔少人就質疑仍然服緊兵役嘅T.O.P點解可以喺現場,根據韓國傳媒報道,現時喺龍山市廳以公益兵身份服役嘅T.O.P刻意向服役單位請假,以可以親自送GD入伍,可見佢哋嘅兄弟情。
更多韓流,喺晒《娛果》
http://fb.com/appledailyent