當年今日
關於我們

【驚魂甫定】當眾被摑曾江稱不介懷:我唔知佢乜嘢事!

蘋果日報 2015/08/12 06:00


四哥謝賢今日在《四個小生》記招完結後,眾目睽睽下出手怒摑曾江,令曾江助聽器飛脫,和事佬修哥胡楓亦中掌。據知事發前,坐在兩人中間的修哥,曾細細聲同四哥講:「唔好嘈喇唔好嘈喇唔好嘈喇。」可惜仍難以制止。

事後四哥接受《蘋果》電話訪問時,逐一說出與曾江拍攝期間之積怨。四哥掌摑曾江後,盛怒離開,曾江及修哥等人回過神來之後,則留下接受訪問。

曾江謂:「我哋誤會咗好多0架喇,大家有時衝動,有乜嘢大問題,大家衝動OK,都幾廿年。」可知四哥不開心?曾江說:「老實講,一個人唔開心點知啫?我都唔知。我有唔開心都黑面,有乜嘢問題?呢個係人之常情,咁多年,對我哋唔會有乜嘢影響,OK嘅。」

至於四哥突然出手,曾江猝不及防中招,佢都話:「我唔知佢乜嘢事,但係佢一嚟到已經好唔開心,問題係谷咗幾耐咁解?我覺得唔係問題。」

四哥表示事件爆發點係噚日錄音時遭曾江搶白,更謂當時已經想打他(詳見另文),曾江對此謂:「我哋成日都窒呢個窒嗰個,唔知佢覺得呢樣嘢窒得佢好唔夠過癮,唔窒有咩意思?我覺得呢啲節目最緊要係真,唔係為得罪唔得罪嘅嘢,要真,睇落去先至親切。」

但問題係,依家大家窒出火,曾江淡然:「睇吓幾時出啫。」會否致電俾四哥?「老實講,我又唔會主動咁做,亦唔需要主動咁做,唔緊要,冇所謂,我唔介懷。」