荷李活男星畢彼特（Brad Pitt）同安琪蓮娜祖莉（Angelina Jolie）舊年9月驚爆離婚，事隔1年，上月就傳出佢哋剎停離婚過程，有機會復合。而今日更傳出呢對金童玉女坐低面對面傾清楚，更同意「有意識地恢復伴侶關係」，上演世紀大復合。而噚日安琪蓮娜公開現身宣傳新戲時，更眼濕濕表示：「我唔享受單身。」並話離婚非常痛苦，睇嚟佢哋真係復合。

根據英國《星期日郵報》報導，安琪蓮娜同畢彼特7個星期前，於友人家中進行婚變後首次會面，更互相擁抱，決定重新開始。據荷李活著名傳記作家Ian Halperin透露，呢場密會係二人分開10個月後首次面對面，佢哋於比華利山莊一名友人家中進行呢場會面，佢描述當時嘅情景：「一架車載住安琪蓮娜先抵達，佢完全冇化妝，過一陣，畢彼特由另一架車落嚟，畢彼特先對住安琪蓮娜行前一步，跟住佢哋就互相擁抱。」

Ian Halperin再透露「嗰日有好多眼淚，然後嗰一刻，佢哋決定重新開始。」二人指今次係「嚟到上帝面前」嘅會面，代表住二人關係嘅嶄新起點。據悉，安琪蓮娜形容二人好似「玉婆」伊莉莎伯泰萊（Elizabeth Taylor）同李察波頓（Richard Burton）一樣，「唔可以一齊生活，但又冇辦法分手」。甚至講笑指「我哋正有意識地恢復伴侶關係」。

此外，安琪蓮娜於洛杉磯公開現身宣傳新戲《First They Killed My Father》，更公開講離婚心情講到眼濕濕，更令人深信佢有意復合。「有時我好似將事情做得好好咁，但我其實只係捱過去，情緒上我經歷好困難嘅一年。」又講到自己唔想單身。「我唔享受單身，呢樣唔係我想要嘅嘢。」更眼有淚光：「（離婚）冇優點，一啲好處都冇，只有困難。」又話自己仲要應付健康問題，好彩6小朋友好生性。「佢哋做得好好，會照顧對方，厲害到我都未見過。見到佢哋點互相幫忙、支持，我好感動，大哥哥會幫細佬妹，而佢哋全部都幫緊我。」而6個小朋友仲嚟到撐場支持媽媽，場面感人。