唔好睇馬雲平時又耍太極、又飲普洱好似好禪咁,其實佢內心嗰股熱血真係熱到你唔信,只要講到某啲話題,佢真係可以好放、有時甚至過晒火。
遠嘅唔講,上星期內地出版嘅《阿里巴巴正傳》就爆出,馬雲曾不留情面咁批評對手京東,揚言「京東將來會成為悲劇」,雖然馬雲隨即喺「來往」補鑊,話任何商業模式都唔完美,適合自己理想同受客戶歡迎就係好方法。
馬雲講嘢咁鬼容易惹火,佢投資嘅瓣數又越來越多,日理萬機,唔夠瞓,導致燥底都好正常,飲多啲涼茶都係好事。而且,之前孖屐成日吹捧佢,指阿里巴巴嘅市值越來越大,馬雲可以再度超越超人做亞洲首富(舊年12月做過一陣),點知超人最近公佈世紀重組後,長實(001)、和黃(013)股價大漲令佢身家上升,喺富豪榜又拋離馬雲,馬雲唔服氣確係要飲涼茶降火。
講番馬雲入股白雲山A股,知情人士又話,好快會同馬雲旗下阿里健康(241)簽署戰略合作協議喎,詳細內容就未見。白雲山旗下公司有咁多產品,放喺阿里健康嘅平台賣,都唔係冇可能㗎。
李華華
mailto:
[email protected]