喺今個星期三美國聯儲局公佈議息結果之前，美股上周五造好，道指升64點收市，港股勢必高開迎接呢個星期。貴為史上第一次聯儲局宣佈縮表嘅重要時刻，投資者理應嚴陣以待，但美股處於高位，真係唔驚？

聯儲局縮減資產規模，有幾點需要注意。第一，由於縮表前無古人，聯儲局必然小心翼翼免成千古罪人，公佈縮表規模較大機會符合市場預期，以免震動市場；第二，聯儲局如何喺不大幅度影響國債、按揭抵押證券價格之下縮表？絕對有一定難度，每月縮減規模能否達成，有一定疑問。

第三，近年解釋過好幾次，聯儲局多次QE一直未構成貨幣供應M2增長大幅偏離經濟增長幅度，反映唔少游資長泊金融體系冇形成龐大乘數效應，呢一點請讀者用Key words翻查本欄舊文，恕不詳述，於是縮表結果較大機會係吸收多餘游資，而唔影響美元金融體系流動性。綜合上述三點，星期三縮表結果似乎難以衝擊市場，亦解釋到點解投資者一啲都唔驚縮表。

不過呢，話明前無古人，所以市場上驚周三縮表結果仍然大有人在，所以唔少人會等周四凌晨出結果之後，睇完市場反應先再加注入市，之前累積咗嘅購買力，會喺今個星期爆發，睇嚟環球股市向上、甚至形成單邊升市機會頗高，值得一博，即管睇吓本周港股係咪咁順利破頂。

蘋果財經，關心你飯碗
http://fb.com/appledailyatm