記:提出城邦論的陳雲直斥支聯會「愛國愛民」的主題,聲言要杯葛六四燭光集會。你如何看陳雲的言論?
陳:如果陳雲真係叫人唔好悼念六四,要中港區隔,我覺得佢係冇咗人性。1989年,過百萬香港人喺八號風球上街,因為我哋係有人性,我哋都擔心香港嘅前途,但係如果呢一刻,你同我講,六四唔關香港人事,咁關邊個事呀?嗰百幾萬人當年出嚟遊行為咗乜嘢呢?每個地方多少也互相倚靠,唔可能完全斬纜。
悼念六四事件,你可以唔支持支聯會,但你唔可以同六四事件割席,話唔關你事,咁樣斬纜係冇人性。我係比較支持范國威同毛孟靜嘅觀點。
記:你經常高舉龍獅旗,你是如何看「國家」這個概念?
陳:有次搭巴士,有個阿媽,指住支青天白日滿地紅旗,話畀個仔知,呢支就係國旗,附近有個男人好不滿,大鬧五星旗先至係國旗。
其實香港人係精神分裂,究竟中華民國、中華人民共和國,定係英國先係我哋嘅國家呢?我自己真係唔識分。我只係愛香港呢個地方。就係咁,好簡單。
03年七一遊行,我已攞支龍獅旗出嚟,俾人話我係殖民走狗、港英餘孽,我只係想畀香港人知道,點解我哋曾經有個好高效率、聽民意嘅政府,點解𠵱家個政府變成咁,03年為《基本法》23條立法,係咪要聽共產黨支笛呢?點解舊有嘅良好制度消失同破壞緊?
mailto:
[email protected]