曾主演韓劇《千秋太后》、《夏日香氣》嘅33歲女星申愛，於2009年同圈外人朴在冠結婚，同年佢拍畢《千秋太后》後就專注家庭生活，申愛亦於2012年為老公誕下一名女兒，之後佢都冇再做幕前工作。

而噚日申愛又傳來好消息，佢再次懷孕，現時懷孕五個月，預產期喺今年年底，據有關人士透露申愛一直都想追多個小朋友，等咗三年終於又再次傳來好消息，全家人都好開心。

據知申愛生完第二胎之後，已決定重歸演藝圈，之前申愛曾經通過好友孫丹菲嘅SNS同粉絲打招呼，粉絲都留言話覺得申愛冇離開呢個圈，仲話好期待佢再拍戲，而申愛亦似乎知道粉絲嘅心意，所以亦決定生完B後再重返演藝圈。