去年有多位日本女星搭上富商，除石原聰美、剛力彩芽及AKB48舊將小嶋陽菜外，性感女神深田恭子近日亦被爆蜜運，對象係大企業Syla Holdings嘅41歲老闆杉本宏之，被指有望在今年嫁入豪門。

現年36歲嘅深田恭子身邊不乏追求者，隨住與龜梨和也嘅姊弟戀告終，佢換畫跟地產大亨杉本宏之秘密發展兩個月，並已在新年期間見家長。

日本雜誌《女性Seven》拍得二人在本月7日晚密會斷正，當日深田恭子在東京郊外拍劇收工，於深夜時份有專車接送直抵東京嘅西麻布，約凌晨2時抵達一間酒吧，原來杉本當時在酒吧等候伊人，經逗留約一小時，兩人步出登上名貴房車，杉本當時更抱住女友嘅愛犬，之後再到深田恭子香閨共度春宵。

另外，杉本被揭曾兩度離婚，於2005年娶首任太太後誕下一女，但婚姻維持約三年，杉本於2011年再婚娶韓國女星吳世貞，其後杉本疑不忠在去年11月正式離婚，當時杉本剛好搭上深田恭子。

精選娛聞，喺晒《娛果》
http://fb.com/appledailyent