打工仔晚晚發夢見到老細、上司怒吼、朝早唔願起身返工面對堆積如山的工作、做嘢無心機兼效率大降，都可能是工作疲勞的症狀，係時候要抖抖，或者出外旅行散心，讓身心放鬆充電。精神科醫生建議計劃行程時，應盡可能避開紅假人流多的日子、趕搭夜機或編排行程太密，也要避免只顧全日瘋狂shopping無休息，否則「放假去旅行仲攰過唔去」。

記者：梁麗兒

「當你搭飛機離開，就好似同香港分開咗，可以放低公事、麻煩事，有得休息，同事、上司知你去旅行，都會少啲搵你，令你唔駛畀人騷擾。」精神科專科醫生李德誠表示，外遊接觸新事物如睇風景，不但令人感覺舒服、開心，也會為腦部帶來刺激，有助提高創造力及靈感。

打工仔究竟隔幾耐去一次旅行最好？李指，因人而異，但鼓勵上班族留意自己的身心狀況，但不建議「捱到最盡」先放假，因為太疲累、太緊張才去旅行，有機會令人無法好好享受旅程及難以充足電。

要盡情放假休息，李建議要避開紅假日子，以免到處人頭湧湧，「紅假旅行入境係機場都大排長龍，避開紅假個人可以無咁攰」。宜避免搭夜機，因缺乏休息，會令人更感疲倦及難以放鬆。去旅行最忌將行程編排太密，一日趕去幾個景點會疲憊不堪，建議一日去一至兩個景點便足夠，其中睇風景、行公園、到「拍過拖」的地方懷緬一下，都會令人心情舒暢、感覺輕鬆。

Shopping是不少人的旅行指定活動，李指，旅行購物雖然為人帶來短暫的開心感覺，但過程要不斷做選擇及決定，其實十分用腦和花精神，絕對是「食電」工作，未必能令人完全放鬆。所以即使要血拚，也不忘要有中場休息，例如食下午茶、返酒店做spa或游水。

若出現下列工作疲勞症狀便是警號，提醒自己係時候要放假休息。

【工作疲勞症狀】
‧難以入睡、半夜紮醒
‧發夢見到工作事情、上司或小時候考試的緊張場面
‧情緒不穩定，容易忟憎或與客人、同事吵架
‧返工啞忍，放工後向家人發脾氣
‧日間容易疲勞
‧早上唔願起身返工
‧做嘢無心機、越做越慢、容易出錯