24歲美國小天后Ariana Grande今年5月在英國曼徹斯特舉行個唱時發生炸彈恐襲，令其巡唱一度叫停。Ariana Grande重踏舞台後，月前更移師到亞洲各站演出，早前先後到日本及韓國開騷都嚴陣以待，既加派警力在會場內外巡邏，又出機動部隊及加強安檢。

Ariana上月因病取消越南一站演唱會，慶幸佢已回復狀態，仲於日前完成北京、上海、廣州嘅大陸場演出，本月21日終於唱到香港，Ariana將踩入亞博館舞台施展渾身解數。對於曼徹斯特發生嘅恐襲慘劇，香港主辦單位Live Nation及亞博方面自然要展開對策，場館會有寄存服務，而昨日Live Nation就於facebook貼出告示，呼籲入場觀眾切勿攜帶任何手提袋及背囊，只可以帶小型透明膠袋入場，當中提到嘅Purse（銀包）就令唔少持票歌迷感到疑惑，有人認為太過嚴謹，規則似足入場考試，不過都有網民及觀眾體諒大會，認為受恐襲事件影響要加強監管亦無可厚非。照主辦單位公佈規條，屆時每位觀眾先要通過金屬檢測器作安檢，亦禁止帶長雨傘、煙花、易燃物品、攝錄設備、橫額、罐裝及樽裝飲品等，年齡限制要大於12歲以上方可進場，身高限制則要高於140cm。