李八方online︱政務官又爆逃亡潮？ 本年度12人離職 5人為首長級
蘋果日報 2021/02/26 20:34
特首林鄭月娥接受報章訪問話佢自己重拾信心，以前嘅佢已經返返嚟，仲讚爆「港版國安法」令香港邁向美好將來咁，之但係同日又傳出將會被迫宣誓效忠嘅高級公務員現逃亡潮。
《信報》今日（30日）引述消息指，自從今年6月底實施「港版國安法」後，過去一兩個月多名資深政務官決定走人，至少4人屬於首長級，包括官位最高嘅D4級、政制及內地事務局副秘書長戴家珮，傳佢或移民新加坡，仲有民政事務局首席助理秘書長鄭兆勛。
八方向公務員事務局查詢，局方回覆指，本年度截至本月24日，政務職系有14人因為退休而離職，當中12名為首長級政務主任，至於因其他原因包括辭職、轉任政府其他職系而離職嘅就有12人，當中5人係為首長級政務主任。
局方亦回覆話，截至本月24日，行政主任職系因退休而離職嘅有23人，至於辭職、轉任政府其他職系而離職嘅，則有54人。
由於局方話冇按月計算人數，呢班人係咪因為國安法跳船呢？外界從上述數字未必睇到，政府內部就冇理由唔知。學地產界立法會議員石禮謙嘅講法，唔係有信心就可以逼到人跟你、服你，但林鄭係咪好領袖？就應該唔止佢心知，公眾都好清楚。
----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！