以前有本港機迷鍾意喺FIFA或Winning等遊戲，自己整香港球員入去隻game度，甚至好耐以前有人喺度惡搞，將歐偉倫同李健和整上遊戲宣傳個封面，又將陳肇麒變成熱刺嘅一分子，等大家笑一餐。不過，月底出嘅《FIFA 18》，就真係有香港球員喺隻game入面，就係今季升上英甲貝利一隊嘅18歲小將戴偉浚。

由於FIFA一向有英甲版權，所有有份註冊嘅英甲球員，都會如實出現喺隻game度。網上近日已流出戴偉浚嘅能力值圖，佢喺《FIFA 18》嘅總能力值有54，位置係CDM，即係中場中。如果睇返啲能力細分，速度係佢數值中最勁一環，有72，亦好符合現實；佢啲傳球、盤扭同防守能力就50幾，體能得48，而射波最差，得32咁多。出道能力低啲唔緊要，喺career mode會有上升空間，話唔定T-sun係隻潛力股嚟呢。

不過，有本港網民就話佢盤扭同傳球應該可以高返少少，而且對於佢個位置係CDM有啲困惑，因為初時大家留意佢都係踢邊多，但其實有睇貝利啲波，領隊李爾奇勒早前好鍾意將佢擺喺中間，助攻又助守，而EA Sports亦應該係根據呢幾場波排陣，將佢設為CDM。

另外，貝利官網就搵咗戴偉浚做MODEL，宣傳球隊嘅練習波衫，一系列嘅練波衫褲由20至50鎊不等；至於球會主客場波衫，官網就買緊42.99鎊，折算大約400蚊港紙左右。喺香港冇得買，唔緊要，最近就有人喺FB搞戴偉浚波衫團購，主客場連章及印字嘅波衫，都係買680蚊港紙，有興趣不妨上FB搵搵。