《冰雪奇緣》中嘅Elsa當時係聽英文配音定粵語配音？《哆啦A夢》阿福/小夫粵語配音員係邊個？未必知，不過一定會認到把聲。

黃紫嫻（Elsa粵語配音員）同黃鳳英（小夫粵語配音）早前接受咗無綫節目《職場制勝》訪問，節目上星期五（2日）播出，節見先係安排呢兩位資深配音員，喺節目中講番入行經過、工作感受，之後以動漫簡介配音員收入。

播完訪問之後，《職場制勝》繼續介紹下配音員嘅工作同收入，舉例稱為劇集配音，一Take半粒鐘，新人約收$50，資深配音員約收$120。節目又引述，廣告配音新人約收$500至$800，資深配音員最高收入有$2,000。

不過，黃紫嫻今日於facebook發聲明，指摘節目提供資料出錯：「最近在TVB有個關於配音行業的訪問，本人黃紫嫻和黃鳳英沒有提及過任何劇集配音和廣告的收費！而內容提及過的所謂劇集配音最高收費是$120一剔（一Take）和廣告最高收費是$2,000，也是失實，至少我可以肯定説，我和有很多在職資深配音員也不止收這個價錢！」

黃紫嫻又指無綫沒做好節目把關：「我不知有關節目提及的資料是從何得知，但作為一個介紹專業行業的節目，是否應該小心把關，確保節目出街的資料沒有失實呢？」黃紫嫻強調節目中提供的薪金相關資訊，全部都不是由她本人及黃鳳英提供。

有網民留言認為新聞資訊出錯令人費解，有配音員留言指於十幾年前已收$150新人價一Take，甚至質疑無綫借節目向配音員壓價，有人留言鼓勵黃紫嫻向《職場制勝》記者提出投訴。

節目今日中午仍可於無綫網站收看，約於傍晚6點將該集節目下架。

精選娛聞，喺晒《娛果》
http://fb.com/appledailyent