【新增動新聞】

英國傳媒報道，利物浦將會喺威爾斯新星活特本18歲生日嘅時候同佢簽份大幅加薪嘅新合約，由年薪40,000鎊（約41萬港元）加到周薪25,000鎊，足足係宜家嘅32.5倍。

活特本今年10月15號就會滿18歲，而據《鏡報》報道，紅軍希望未來至少六年呢位新星都可以留喺晏菲路，所以準備喺佢18歲生日大幅加人工，相關談判已經進行緊，相信佢嘅新合約周薪會係大約25,000鎊。

利物浦嘅政策規定，17歲球員簽嘅第一份職業合約底薪最多只係40,000鎊，而活特本舊年11月簽嘅三年合約，第一年人工上限亦係呢個。不過，紅軍領隊高路普一直認為活特本係有好潛質嘅球員，加上佢喺最近喺兩場世界盃外圍賽後備上陣一射一傳，協助威爾斯擊敗奧地利同埋摩爾多瓦，更加證明佢嘅質素。