港股連升多日，好友話牛市重臨，淡友則話只係熊市反彈，牛熊爭持莫衷一是，香港政治步入豬市卻毋庸置疑。港大民意研究計劃噚日公佈特首及司局長最新民望數字，各人都受惠於對抗豬流感一役有功而民望上升，一仗功成萬骨枯，呢仗功成齊歡呼。
其中食物及衞生局局長周一嶽民望更由谷底反彈，好似笨豬跳咁，由低位一chok急彈17個百分點，支持率由一個月前32%驟升至49%，係自去年2月以來新高，喺眾局長中民望排名第四位。重新享受到市民掌聲，周一嶽噚日開記者會時雖然疲態畢露，有時仲忍唔住瞌眼瞓，但都掩唔住興奮心情，更同病毒專家袁國勇講笑，話病毒洗牌、變種科學家最開心，做官卻好擔心。

終一洗頹勢唔使孭鑊

特區政府民望低迷多年，煲呔救市、財爺派糖都挽救唔到支持度，今次抗疫報捷，司局長民望全線上升，官場上下士氣大增，有官員私下話，民意已經反映政府今次封酒店、隔離旅客措施正確，唔單止戰勝一役，連輿論戰都贏埋，好成功。
周一嶽上任後民望一直於中、下游橫行，孔雀石綠魚、蘇丹紅蛋、三聚青氨奶等有毒食物輪流襲港，手術失誤、派錯藥、發霉藥等醫療事故頻生害死人，幾乎個個禮拜都爆出醜聞，周一嶽更被謔稱周一鑊，即係每個星期都要孭一鑊，而且鑊鑊新鮮鑊鑊甘，孭咗咁多鑊，受盡千夫所指，周一嶽今次終於一洗頹勢，難怪噚日心情咁靚。
局長噚日確係幾風騷，透露已提醒下屬好趁豬流感第二波未殺到好好休養生息，否則下次豬流感來襲時，可能冇精神打持久戰。八方則恐怕周一嶽心雄累事，事關呢次抗疫過關，唔代表下次都咁順利，今次冇社區爆發，政府集中火力封鎖一間酒店自然綽綽有餘，一旦戰線拉開，政府仲係咪可以應付，相信好多市民心中有個問號。
有驚無險過一關，政府下一個戰場係7.1遊行，財爺個「加碼預算案」係關鍵，否則官員民望彈升可能只係虛火，好似笨豬跳咁，chok一chok就撻返落去。
mailto:[email protected]