成為全球最高身價球員後，尼馬可以話呼風喚雨，連保鑣都要世界級。佢最近就聘請咗UFC格鬥選手Nordine Taleb，做佢喺巴黎嘅貼身護衛。

Nordine Taleb本身係法國人，已經年屆36歲，但仲未退休，家陣喺UFC次中量级別打緊MMA，今年較早前先打完兩場拳賽。原本呢個月要備戰另一場拳賽，點知對手受傷，所以尼馬既然出到高薪，就梗係接埋嚟做，搵多一份。

不過，睇埋Nordine Taleb近年戰績，尼馬未必咁老定，由2015去到今年打咗五場拳賽，只係得3勝2負，但有位格鬥專家喺身邊，聽落都真係猛料啲。