跑埋星期日（16日）沙田日馬，本地賽事終於有一個小休，皆因下星期三（19日）冇夜馬跑。

近期手風極順嘅潘頓在星期日賽後，就會同家人到海南島充電，而於今晚（12日）及周日兩次賽事，潘頓勢將繼續大開殺戒，搵旅費兼進一步刷新個人單季最佳成績。

今晚第三場五班泥地1800米容廐「勇福星」，今季跑過三次全由楊明綸策騎，包括4月初五班泥地1650米跑入亞軍，5月31日泥閘仍然由楊明綸主理，這次排位表卻寫上潘頓大名。

練馬師容天鵬證實是潘頓主動索騎的，他謂既然潘頓近期成績咁犀利，一於益佢。今晚「勇福星」將首次由潘頓策騎出賽，楊明綸同場則改騎初跑泥地、需要搶分救亡的丁冠豪麾下戰馬「金禧足球」。

「勇福星」只曾喺泥地上名及勝出，季初右後腳有傷，本身季內只跑過三仗，幸好4月開始出賽同操練頻率復趨正常，上仗於唔太擅長的田草1800米三甲不入可理解。

潘頓今季曾騎過同場「如沐春風」、「事必獲利」，最終今次佢都唔揀，而撬咗「勇福星」來騎，後駒季內跑得少，季尾賺到體力，加上獲潘頓睇中，自然更值得重視。

-----------------------------
【新聞有價】6月17日起 繼續撐蘋果
http://bit.ly/2IJ24ZR