講到好生養，38歲日模椋名凜（Rin）生產力驚人，佢當年挾34E巨咪來港發展，其後返回東京老家，10年奉子成婚嫁給同鄉老公高村直樹，結婚五年抱四，已育有一子一女及一對龍鳳胎，原來六口之家未夠數。一對龍鳳胎上月剛過2歲生日，Rin日前又宣佈懷有第五胎，佢話已有9個月身孕，預產期喺下月中，有過多次生產經驗，Rin呢胎當然淡淡定定。

Rin嘅大仔長子哉衣6歲，二女香里奈5歲，龍鳳胎就2歲，Rin生完龍鳳胎時都講過想封肚，點知今年初又有孕，佢喺facebook公布喜訊，Rin貼出超聲波圖，顯示BB喺肚中情況，佢話：「我再度陀第五胎，家庭即將添新成員，是一名囡囡，將於明年1月底生產，到時我就有兩子三女啦！」Rin好享受做半職媽咪，因為佢仍然有接模特兒拍照工作，連四名小孩，有時都會參與，有時甚至全家出鏡，大晒溫馨。

《蘋果》向密密生唔停嘅Rin送祝福，佢日前話：「多謝。」Rin呻o依家個肚越來越大，體重上升，所以行動比較緩慢，不過佢好叻照顧住四個寶寶，每日都會開車接送子女返學，佢話大仔二女都好幫手，會幫忙照顧龍鳳胎弟妹，Rin日前就帶佢哋出去買聖誕樹佈置，長子哉衣抬着未拆盒嘅聖誕樹回家，弟妹即分工合作將飾物掛上去。Rin個老公高村直樹單車運動員出身，估計體力好，夫妻特別好生養。

更多娛聞，喺晒《娛果》
http://fb.com/appledailyent