利物浦嘅巴西球星菲臘比古天奴今夏希望離隊加盟巴塞隆拿，最後喺轉會窗閂之前都未成事，佢今季亦未曾為球隊出賽，但星期三喺對主場西維爾嘅歐聯比賽76分鐘後備上陣，古天奴仍然獲得主隊熱烈歡迎，喺佢上場嘅時候拍手歡呼。呢個情況難免令人諗起阿仙奴嘅智利球星阿歷斯山齊士，事關同樣希望離隊但未走到嘅山神，早前喺對般尼茅夫嘅比賽後備上陣，今季第一次喺主場亮相雖然球迷都有啲歡呼聲，但噓聲就更加大，包括阿仙奴球迷在內嘅唔少網民，都有喺Twitter講番呢個情況，山神同古仔呢兩位南美球星可以話係同人唔同命！