受到唔少球迷支持嘅前鋒卓耀國，上個月同港超聯球會標準流浪解約，之後又話返國內落班，最後唔成事，又傳佢話去歐洲搵機會，擾攘多時，呢位壞孩子周四晚原來成功喺歐洲落班，簽約加盟瑞士挑戰聯賽球會基亞索（FC Chiasoo），合約為期兩年，標準流浪總監李輝立就話聽到阿國落到班都戥佢開心，希望佢可以戒除壞習慣，專心爭取到落場，唔好過到去齋練啦。

流浪今季高調簽入卓耀國、黎洛賢同劉卓軒幾個「壞孩子」，可惜佢哋唔生性，劉卓軒同卓耀國解約離隊，淨低黎洛賢留隊，但冇乜好表現。卓耀國幫港隊重奪省港盃後，盛傳外流，試過北上試腳，又話轉會中甲，最終觸礁，據聞流浪頂唔住佢啲壞習慣，提前同佢解約。

呢位23歲前鋒今個月15日離港，同佢個經理人去咗瑞士，周三落實加盟基亞索。基亞索係瑞士挑戰聯賽（即瑞士次級聯賽）球隊，共有10隊參賽，基亞索暫排第八位，家陣正值季中，過咗註冊期，所以阿國只可齋操同踢吓友賽。球迷對瑞士挑戰聯賽可能比較陌生，呢個聯賽到五月就完，榜末隊要降班，新季七月開鑼。

流浪李輝立接受查詢時話，聽到卓耀國去到瑞士落班都戥佢開心：「希望佢可以改過，專注踢波，唔似佢喺香港成日要提心吊膽，驚呢樣驚嗰樣，至於係咪真踢到成績，要睇佢自己，因為佢有啲質素，但要喺歐洲踢到成績唔係咁易。」李輝立仲爆除咗阿國，今季踢過流浪而同樣被解約嘅法援中鋒禾達，原來都去咗歐洲落班：「足總話瑞典足總要向流浪拎轉會紙，當時以為係卓耀國，但阿國好似係去咗瑞士，原來係瑞典足總要禾達個轉會紙。」至於卓耀國幾時正式轉會，李輝立都唔知，因為基亞索仲未開聲問流浪攞轉會紙。

曾經去過葡萄牙落班嘅歐陽耀冲都戥阿國開心，「香港球員要外闖，先知同國際距離，留港進步唔會太大，有機會外闖就要習慣起居飲食，全部要靠自己，冇乜人幫到，語言同飲食要適應。」

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM