鄭伊娜（Ena）去年10月約滿亞視，都算執返身彩，起碼o依家唔會俾亞視拖糧嘛。佢離開亞視之後，憑住過往喺亞視主持同拍攝旅遊飲食節目嘅經驗，決定自資拍攝網上旅遊節目，之後計劃推出旅遊書。

早前Ena去到台北嘅北投同西門町4日，吃喝玩樂浸溫泉食雪糕，Ena為咗吸引網友關注，會加入唔少性感演出，喺介紹北投溫泉旅館，Ena喺12度低溫着住三點式泳衣一邊浸溫泉一邊食雪糕，Ena話：「暫時都係自資，會搵好多唔同嘅贊助，之前我已經去過哈爾濱拍咗一個節目，之後會計劃去沙巴，嗰度會有個島主贊助。」杜如風式嘅旅遊節目風格，引起極大迴響，Ena就話唔會仿效:「我都係輕鬆自然為主，唔想太正經，着吓背心短裙三點式，sell青春。」