港股噚日絕對係炒股唔炒市，合埋眼隨便揀一隻去年樣衰股，閒閒哋升十個八個。係咪虛火，不妨睇多一兩日。大市周初似跌不跌，噚日更挾高319點，筆者張對冲期指淡倉會喺21300止蝕，如果升到此水平，大藍籌肯定成為升市火車頭，屆時港股或真的挾到你唔信。
雖然大市蠢蠢欲動，但個別股份卻令人有戒心，其中一隻是騰訊控股（700）QQ。內地傳媒報道，微博實名制進入倒數階段，新浪、搜狐、網易、騰訊四大門戶網站微博，將於下月16日實行實名制，不用真名登記的微博用戶，只能瀏覽，不能發送微博及轉發。
facebook正進行上市程序，與其性質相若的Twitter估值亦大提升。由於fb及Twitter尚未能進入內地，微博已成為兵家必爭之地，冀望成為中國版fb生金蛋工具。事實上，近年無論新浪及騰訊，皆投入大量資源營運微博，招徠以億計用戶，現時可謂處於燒銀紙最高峯階段。
實施實名制，最直接影響是用戶數目大幅急跌，事關現時開戶口毋須真名登記，每個人可以註冊幾個甚至上百個戶口，但如要披露個人資料才能發送微博，相信很多用戶會轉移陣地，反正現時內地除微博外，不需要實名註冊發佈資訊的貼吧、論壇網站到處都是，如用戶移情別戀，無疑令新浪、騰訊昔日的工夫付諸東流。

近日在美國上市的新浪網，股價插水式下跌，周一及周二皆挫6.6%，相信與微博行實名制有關。據未來資產報告指，新浪微博的用戶基數、使用時間和訪問時間已連跌兩個月。另外，實名制亦會令「僵屍粉」和「網路水軍」的人頭比例急跌，以人頭戶口作估值的科網股，價值自然難以維持高水平。
騰訊最近半年每逢升抵190元皆見頂回吐，上周再闖關失敗。彭博綜合券商預測，騰訊今年預測PE超過20倍，預測PB逾6倍，以目前市場通街十倍樓下好嘢，排隊都未輪到買QQ。
騰訊近日亦受空軍淡友瞄準，2月至今共6個交易日，平均每日沽空比率達25%，有3日更超過三成，係咪有人造嘢，投資者自己判斷吧！

王昇
本欄逢周二、四刊登