佢係一個歌手，2013年出道，佢叫做葉寶安，2018年，再出道叫做黎俊彥，除咗改名換姓，佢仲來咗一個大變身，佢係真人版嘅《瘦身男女》劉德華，用咗大半年，搣走120磅脂肪，6呎高，160磅，結果都係溝唔到女，但係佢已經擁有人生中最可貴嘅健康。

黎俊彥最近同可嵐合唱咗首講癌病嘅歌《心聲回應》，佢彈番出來，瘦咗好多，佢話：「嗰時有個藝名叫做葉寶安，係一個286磅嘅大肥仔，嗰時唱片公司叫我唔好減，成班歌手冇肥人，你係一個肥仔，企喺中間你咪好突出囉！都work㗎，幾特別，一個肥仔傻下傻下，吸引到人，咁大份。」

當時啲人叫佢做少年張偉文，肥係賣點，所以佢一啲都唔介意，佢話：「有段時間等培訓，有叫我唱經典金曲，我嗰時個style同張偉文有差唔多，都係肥喇！不如嘗試下，行下先，所以成日煲舊嗰啲，當咗佢做偶像，仲有一張同張偉文嘅合照，好難得。嗰時啱啱畢業，公司叫我做咩咪做，諗番轉頭係一個難忘嘅經歷，我唔mind做張偉文，其實我覺得張偉文好掂，把聲好靚。」

2013新人出道，但係好快又消失咗，係因為屋企：「同舊唱片公司又有意見分歧，人又開始大，開好諗前途，係時候離開，腳踏實地，搵份工做住先，起碼有收入，儲下錢。」

採訪：楊潔雯、張家倫
攝影：陳俊強、沈健程
攝錄：廖達燊
場地：FAC Sportagon
服裝：Dusty