今年初菜園村引發全城萬人包圍立法會，唔單止感動萬千港人，仲震撼埋南中國。內地《南方都市報》向菜園村民頒發「年度公民獎」，為一片愁雲慘霧嘅村民冲喜吓。
菜園村關注組主席高春香遠赴深圳領獎，獎座運抵菜園村後，村民蜂擁同個獎合照。早前地政處一輪收地攻勢，菜園村拆到七零八落，幾日前有工人亂咁掘蕉樹，村民阻止，反被人以鐮刀兇番轉頭。村民代表早前與鄉議局及政府舉行三邊會議，官員稱月底會再有清拆行動，由於新村未落成，村民冇地方落腳，要求再押後，點知有官員輕佻反問村民：「我點知你呀？」代表鄉議局出席嘅發叔兒子劉業發全程沉默，專注mon實部手機，疑似打機。