吳君如昨日以大使身份到圓方出席「第一屆香港兒童國際電影節」，自爆係無收錢做大使嘅佢，表現好落力。

除咗分享同女兒陳是知嘅親子活動係睇戲外，佢又擔任埋頒獎嘉賓。吳君如笑指自己唔係廿四孝媽媽，但就係同小朋友睇得戲最多嘅家長：「自己又係演員，屋企個partner又係監製，我最近都做電影監製，個女有咩辦法唔接觸電影。」受訪嗰陣，君如話：「入戲院睇戲好過成日玩手機，大家又有個幾兩個鐘靜下。」

現時身兼電影監製嘅佢，更要求女兒拍片：「佢仲肯add我instagram同facebook，其實我自己有6個account。佢成日想呃我like，但我話佢都未做到啲我好like嘅野，我仲買咗個like嘅印仔，儲夠100個就可以做一樣野，佢仲係小朋友，都要俾啲鼓勵。」佢笑謂自己唔係做親子電影思想嘅媽媽，所以未有計劃做專為小朋友而設嘅電影。

另外，君如指暑假已計劃與父親、細佬等舉家到英國，直言唔擔心恐襲：「我等緊啲機示，如果有我都會決定去，最多去到啲景點就快閃影張相即刻走，呢啲生死有命嘅。」