英超兩支升班馬錫菲聯同屈福特，護級形勢殊不樂觀，周中的聯賽盃第3圈賽事，恐怕會採取「半放棄」態度，一於敲兩軍主場贏唔到波。
錫菲聯今季升班之後，連同盃賽都只係贏過兩場咁大把，攻力真係令人擔心，今仗面對伯明翰，對手話晒上季都仲喺英超角逐，級數唔低你好多；喜見伯明翰上仗終於反底贏波，而且今季已3次1:0小勝對手，一於博呢個波膽。

再追屈福特遭悶和

屈福特總算比錫菲聯稍有起色，上仗作客迫和查爾頓，攞番1分幫補吓，不過聯賽盃第2圈對低組別嘅阿克寧頓，法定時間打和0:0，上季對住今仗對手侯城，亦都悶和0:0，一於再追雙方悶和收場。
周中除了意甲開快車，荷甲波亦都一樣；燕豪芬雖然有名帥軒廸克離隊，由朗奴高文接手，但表現仍然冇減弱，攻力亦都保持；睇番燕豪芬今季入球，經常與3有緣，上仗已經作客大炒阿爾克馬爾3:1，今次主場對鹿特丹斯巴達，博客軍入唔到波，要3:0。
阿積士主場對海牙，牌面亦都贏晒，不過海牙作客都博到1、2個入波，與其博阿積士贏「主其他」，不如敲個總入球「7+」更過癮。文：牽牛